குறள் - 0055

அறத்துப்பால் - Virtue

இல்லறவியல் - Domestic Virtue

வாழ்க்கைத் துணைநலம் - The worth of a wife

தெய்வம் தொழாஅள் கொழுநன் தொழுதெழுவாள்

பெய்யெனப் பெய்யும் மழை.

மு.வ உரை:

வேறு தெய்வம் தொழாதவளாய்த் தன் கணவனையே தெய்வமாகக் கொண்டு தொழுது துயிலெழுகின்றவள் பெய் என்றால் மழை பெய்யும்.

பரிமேலழகர் உரை:

(இதன்பொருள்) தெய்வம் தொழாஅள் கொழுநற்றொழுது எழுவாள் பெய் என = பிறதெய்வந் தொழாது தன்றெய்வமாகிய கொழுநனைத் தொழாநின்று துயிலெழுவாள் பெய்யென்று சொல்ல;

மழை பெய்யும் = மழை பெய்யும்.

பரிமேலழகர் உரை விளக்கம்:

தெய்வந் தொழுதற்கு மனந் தெளிவது துயிலெழுங் காலத்தாகலின் 'தொழுதெழுவா' ளென்றார். தொழாநின்று என்பது 'தொழு' தெனத் திரிந்து நின்றது.தெய்வந்தா னேவல் செய்யுமென்பதாம்.

கருணாநிதி  உரை:

கணவன் வாக்கினைக் கடவுள் வாக்கினை விட மேலானதாகக் கருதி அவனையே தொழுதிடும் மனைவி பெய் என ஆணையிட்டவுடன் அஞ்சி நடுங்கிப் பெய்கின்ற மழையைப் போலத் தன்னை அடிமையாக எண்ணிக் கொள்பவளாவாள்.

சாலமன் பாப்பையா உரை:

பிற தெய்வங்களைத் தொழாமல் கணவனையே தெய்வமாகத் தொழுது வாழும் மனைவி, பெய் என்று சொன்னால் மழை பெய்யும்.

Couplet:

If she, who does not worship God, but who rising worships her husband, say, let it rain, it will rain.

Explanation:

No God adoring, low she bends before her lord; Then rising, serves: the rain falls instant at her word!.