குறள் - 0157

அறத்துப்பால் - Virtue

இல்லறவியல் - Domestic Virtue

பொறையுடைமை - Forbearance

திறனல்ல தற்பிறர் செய்யினும் நோநொந்து
அறனல்ல செய்யாமை நன்று.

மு.வ உரை:
தகுதி அல்லாதவைகளைத் தனக்குப் பிறர் செய்த போதிலும், அதனால், அவர்க்கு வரும் துன்பத்திற்காக நொந்து, அறம் அல்லாதவைகளைச் செய்யாதிருத்தல் நல்லது.

பரிமேலழகர் உரை

திறன் அல்ல தன் பிறர் செய்யினும்= செய்யத் தகாத கொடியவற்றைத் தன்கட் பிறர் செய்தாராயினும்;

நோ நொந்து அறன் அல்ல செய்யாமை நன்று= அவர்க்கு அதனால் வருந்துன்பத்திற்கு நொந்து தான அறன் அல்லாத செயல்களைச் செய்யாதிருத்தல் ஒருவனு்க்கு நன்று.

பரிமேலழகர் உரை விளக்கம்

உம்மை சிறப்பும்மை. துன்பத்திற்கு நோதலாவது, "உம்மை யெரிவாய் நிரயத்து வீழ்வர்கொல்" (நாலடியார்-58) என்று பரிதல்.

கருணாநிதி  உரை:
பிறர் செய்திடும் இழிவான காரியங்களுக்காகத் துன்பமுற்று வருந்தி, பதிலுக்கு அதே காரியங்களைச் செய்து பழி வாங்காமலிருப்பதுதான் சிறந்த பண்பாகும்.

சாலமன் பாப்பையா உரை:
கொடியவற்றைப் பிறர் தனக்குச் செய்தாலும், பதிலுக்குத் தானும் செய்தால் அவர் வருந்துவாரே என வருந்தி, அறம் அல்லாதவற்றைச் செய்யாது இருப்பது நல்லது.

Couplet:
Though others inflict injuries on you, yet compassionating the evil (that will come upon them) it will be well not to do them anything contrary to virtue.

Explanation:
Though others work thee ill, thus shalt thou blessing reap;
Grieve for their sin, thyself from vicious action keep!.