குறள் - 0049

அறத்துப்பால் - Virtue

இல்லறவியல் - Domestic Virtue

இல்வாழ்க்கை - Domestic Life

அறனென்ப் பட்டதே இல்வாழ்க்கை அஃதும் 

பிறன்பழிப்ப தில்லாயின் நன்று.

மு.வ உரை:

அறம் என்று சிறப்பித்து சொல்லப்பட்டது இல்வாழ்க்கையே ஆகும். அதுவும் மற்றவன் பழிக்கும் குற்றம் இல்லாமல் விளங்கினால் மேலும் நன்மையாகும்.

பரிமேலழகர் உரை:

(இதன்பொருள்) அறன் எனப்பட்டது இல்வாழ்க்கையே = இருவகையறத்தினும் நூல்களான் அறனென்று சிறப்பித்துச் சொல்லப்பட்டது இல்வாழ்க்கையே;

அஃதும் பிறன் பழிப்பது இல்லாயின் நன்று = ஏனைத்துறவறமோவெனின், அதுவும் பிறனாற் பழிக்கப்படுவதில்லாயின் நன்று.

பரிமேலழகர் உரைவிளக்கம்:

ஏகாரம் பிரிநிலைக்கண் வந்தது. இதனாற் பிரிக்கப்பட்டது துறவறமாகலின், அஃது என்னுஞ்சுட்டுப்பெயர் அதன்மேனின்றது.

பிறன்பழிப்ப தென்றது கூடாவொழுக்கத்தை.

துறவறம் மனத்தையும் பொறிகளையுயும் ஒறுத்தடக்கவல்ல அருமையுடைத்தாயவழியே அவற்றை யொறுக்க வேண்டாது ஐம்புலவின்பங்களாரத்துய்க்கும் எண்மையுடைய இல்வாழ்க்கையோடு அறமென ஒருங்கெண்ணப் படுவதென்றவாறாயி்ற்று.

இந்நான்கு பாட்டானும் இன்னிலையே பயனுடைத்தென இதன் சிறப்புக்கூறப்பட்டது.

கருணாநிதி  உரை:

பழிப்புக்கு இடமில்லாத இல்வாழ்க்கை இல்லறம் எனப் போற்றப்படும்.

சாலமன் பாப்பையா உரை:

அறம் என்று சிறப்பிக்கப்பட்டது, மனைவியுடன் வாழும் வாழ்க்கையே; துறவற வாழ்க்கையும், பிறரால் பழிக்கப்படாமல் இருக்குமானால் நல்லது.

Couplet:

The marriage state is truly called virtue. The other state is also good, if others do not reproach it.

Explanation:

The life domestic rightly bears true virtue's name; That other too, if blameless found, due praise may claim.